Sport
Hier word ʼn baie wye verskeidenheid sport aangebied. Elke leerder kry die geleentheid om deel te neem aan ʼn sport volgens elke unieke leerder. Daar word op massa deelname gefokus. Afrigters fokus daarop om die beste vir elke kind te bied. Alle ouderdomme kry die kans om deel te neem.
Rugby
Laerskool Muldersdrif se rugby seisoen begin vroeg in Februarie en strek tot Julie elke jaar. Laerskool Muldersdrif speel ‘n hele klomp vriendskaplike wedstryde elke jaar vir opwarming vir die Liga seisoen wat in kwartaal twee plaasvind. Ons neem deel aan die Premier Liga.
Ons fokus op massa deelname en wil so veel leerders moontlik blootstelling gee aan die sportsoort. Daar word gefokus op vaardige en ontwikkeling van spelers vir die toekoms om die beste uit elke speler uit te kry.
Laerskool Muldersdrif gaan verseker nog Springbokke by sy lys voeg soos Willem Alberts
Netbal
Netbal word aangebied vir 0/6 tot 0/13-spelers. Die netbalseisoen begin amptelik in die tweede kwartaal, maar ons dogters begin reeds in Februarie oefen.
Die 0/6 tot 0/8-dogters speel mini-netbal.
Die 0/9-dogters neem jaarliks aan vriendskaplike toernooie gedurende April en Mei deel. Die verskeie posisies word op ‘n rotasie basis toegepas en vaardighede word tydens hierdie wedstryde aangeleer.
Netbal vir O/10, O/11, O/12, en O/13 word by die JOMO liga ingeskryf. Dit is die sterkste liga in Johannesburg. Elke ouderdomsgroep het ‘n A, B en C-span. Die O/12A en O/13A spanne kan kwalifiseer vir die Gauteng Netbal Kampioenskappe.
Krieket
In 2023 is 25 seuns en dogters verkies tot hul verskillende Guateng-Wes Krieket spanne.
Ons kan ook spog met 2 spanne per ouderdom wat aan die liga deelneem en ons is ook trots om te kan sê dat ons dogters span, Gauteng-Wes wenners is van 2023.
Ons glo ook in vroeë ontwikkeling by ons spelers en daarom begin ons al op O/8 vlak harde bal krieket speel.
Ons streef na massa deelname en groei. In 2023 is daar in totaal 105 krieketwedstryde gespeel van O/6 tot O/13.
Tennis
Kom sluit gerus aan by Mullies tennis. As jy wil speel vir ontspanning of as jy ʼn beginner is, is dit geen probleem nie. Kom speel saam op Maandae middae na skool. Daar word gereeld vriendskaplike rondomtalies gereël waar ons teen ander skole speel- slegs vir die pret!
Die meer ernstige tennisspeler word uitgenooi om deel te word van ons ligaspanne. Daar is geleenthede om tot op D2-vlak te presteer!
Ons sien uit om jou op die tennisbane te sien!
Mini-Netbal
Die Mini-Netbal sluit ouderdomsgroepe van 0/6 tot 0/9 in. Ons fokus op massa-deelname en ontwikkeling met die oog om basiese vaardighede en genot vir die spel te ontwikkel.
Leerders leer spanwerk en uithouvermoë. By Mullies wil ons ʼn liefde vir netbal by die leerders kweek.
Swem
Laerskool Muldersdrif se swem seisoen begin in September. Proewe word gehou waartydens `n swemspan gekies word wat in Oktober aan vriendskaplike ligawedstryde deelneem in Krugersdorp. Muldersdrif lewer elke jaar puik swemmers op, wat ons elke jaar tydens die Krugersdorp kampioenskappe trots maak.
Hokkie
Ons ses tot nege jariges neem reeds deel aan hokkie. Mullies se juniors speel meestal vriendskaplike wedstryde. Die spanne bestaan uit seuns en dogters en hulle speel gemengde wedstryde.
Ons senior spanne speel in die Elite liga in die D2-streek. Ons dogters spanne sluit die ouderdomsgroepe vanaf 0/10 tot 0/13 in.
Ons het ook twee seuns spanne. Die junior seunspan bestaan uit 0/10 en 0/11 seuns. Die seniorspan bestaan uit 0/12 en 0/13 leerders.
Ons het ook leerders wat jaar na jaar vir die D2-span kwalifiseer en gekies word vir die provinsiale span (Southern Gauteng).
Landloop
Mullies neem graag deel aan die Super 12 se landloop-byeenkoms. Ons geniet dit ook om aan die ligas wat deur Laerskool Hekpoort en Laerskool Bekker aangebied word, deel te neem. Landloop begin met die 0/9 leerders, die jonger maats mag egter saam met die 0/9 leerders deelneem. Byeenkomste vind meestal op Vrydae middae plaas.
Die kortste afstand is 2 km. Maats wat baie goed vorder tydens die liga deelnames, staan ook ‘n kans om die Krugersdorpspan te haal. Daarna kry hulle die geleentheid om vir die D2-span te kwalifiseer.
Skaak
By Laerskool Muldersdrif speel ons van Januarie tot November skaak. In samewerking met SJ Skaak-akademie kry ons leerders kwaliteit afrigting en neem aan verskeie skaaktoernooie deel. Alle leerders vanaf Gr. 1 tot Gr. 7, wat belangstel, mag gratis inskakel by die skaakklasse op Vrydag-oggende om 06:30. Skaak ontwikkel en bevorder verskeie vaardighede soos verstandelike – en sosiale ontwikkeling, konsentrasie en probleemoplossing. Lewensvaardighede, logiese denke asook waardes soos deursettingsvermoe en pligsgetrouheid word ook bevorder.
Skaakmat is ons laaste woord!
Rasieleiers
’n Spansport wat selfvertroue in jouself en ander bevorder. Dit is ’n sport waar dans, akrobatiese bewegings en tuimelroetines saamgevoeg word. Seuns en dogters van 0/9 tot 0/13 benodig geen dans of akrobatiese vaardighede om deel van Mullies se rasieleierspan te word nie. Deelname kan geskied van skoolspanvlak tot op internasionale vlak. Kompetisietyd strek van Februarie tot Julie. Kom word gerus deel van hierdie ongelooflike sport.
Kontak ons
Hoek van Hendrik Potgieter en R28
Muldersdrif, Krugersdorp, Gauteng
011 662 1929 · admin@mullies.net